Wara stqarrija konġunta mar-REWS fis-6 ta’ Marzu 2019 dwar tliet inċidenti li potenzjalment kienu jinvolvu ċilindri tal-gass, l-MCCAA wettqet spezzjonijiet fuq ċilindri tal-gass u apparat tal-gass; filwaqt li saru verifiki addizzjonali fuq is-sigurtà ta' prodotti relatati disponibbli fuq suq. Testijiet oħra għadhom għaddejjin.

Id-Direttorat għas-Sorveljana tas-Suq fi ħdan l-MCCAA qiegħed iwettaq kontrolli meħtieġa dwar l-ittestjar perjodiku fuq iċ-ċilindri tal-gass, inklużi l-valvijiet.

Fl-istess ħin, id-Direttorat għamel ukoll kontrolli ad hoc ta’ kampjuni ta’ regolaturi tal-gass u valvijiet li bħalissa huma disponibbli fuq is-suq. Disa’ (9) regolaturi differenti ta’ marki differenti u t-tliet (3) valvijiet taż-żewġ marki differenti li tqiegħdu fuq is-suq, tneħħew minn fuq is-suq u bħalissa qed jiġu ċċekkjati. Preliminarjmanent, spezzjonijiet viżwali, ma qajmu l-ebda tħassib, u d-dokumenti jindikaw li r-regolaturi ġew manifatturati skont l-istandard relatat.

Id-Direttorat qed jagħmel ukoll verifiki dimensjonali, u r-riżultati preliminari ma jindikawx li dawn il-prodotti huma ta’ riskju għall-konsumaturi. Aktar ittestjar rigoruż tar-regolaturi huwa skedat.

L-MCCAA tieħu din l-opportunità biex tfakkar lill-konsumaturi biex dejjem jiċċekkjaw ir-regolaturi u l-pajpijiet u biex jassiguraw li dawn il-prodotti ma jintużawx iktar milli huwa indikat fuq il-prodott innifsu. Huwa wkoll importanti li r-regolaturi użati huma konformi mal-informazzjoni misjuba fuq il-prodott. It-tali informazjoni għandha tinkludi:

It-tikketta fuq il-prodott:

• L-istandard EN16129
• It-tip ta’ gass ma’ xiex jintuża, f’Malta LPG (gass likwidu tal-petroljum)

Fuq in-naħa ta’ taħt tar-regolatur:

• Id-data tal-manifattura
• Id-dimensjoni tal-valvijiet li hija ddisinjata biex taħdem magħhom, f'Malta Ø 22mm

Fuq l-ippakkjar jew fuq il-fuljett ta’ informazzjoni:

• Il-ħajja tal-prodott
• Struzzjonijiet dwar kif tħaddem il-prodott

Wieħed jista’ jikkuntattja l-MCCAA fuq [email protected]  għal aktar informazzjoni jew mistoqsijiet.