Il-Ministru għall-Agrikoltura, is-Sajd, l-Ikel u d-Drittijiet tal-Annimali Anton Refalo, flimkien mas-Segretarju Parlamentari għall-Protezzjoni tal-Konsumatur u l-Indafa Pubblika Deo Debattista, nedew dokument ta’ linji gwida dwar l-użu xieraq ta’ veleni perikolużi wara konsultazzjoni pubblika li saret mill-Awtorità ta’ Malta għall-Kompetizzjoni u għall-Affarijiet tal-Konsumatur, l-MCCAA.

Dan tnieda wara li s-sena li għaddiet il-Kunsill għall-Ħarsien tal-Annimali mmexxi minn Romina Frendo ssottometta lista b’seba’ proposti bħala prijoritajiet li għandhom jinkisbu għall-ħarsien tal-annimali, fosthom dik tat-tneħħija ta’ veleni perikolużi fis-swieq lokali b’mod wiesa’ u li ġieli jkun hemm xi abbużi fl-użu tagħhom.

Il-ministeru ħadem flimkien mal-Kunsill għall-Ħarsien tal-Annimali kif ukoll mal-MCCAA biex jiġi identifikat fejn qed ikun hemm użu ħażin tal-velenu tal-bebbux u tinstab triq ‘il quddiem.

Waqt konferenza tal-aħbarijiet, il-Ministru Anton Refalo tkellem dwar l-importanza tad-djalogu u qal li, “Hawnhekk qed naraw kemm hu importanti li saret konsultazzjoni pubblika mill-MCCAA dwar l-użu xieraq ta’ dawn il-veleni. L-għan kien li nisimgħu dwar dawn il-kwistjonijiet u niltaqgħu wiċċ imb’ wiċċ mal-persuni kkonċernati biex b’hekk neliminaw il-problema mill-aktar fis possibbli. Fl-aħħar mill-aħħar, l-għan huwa li nkomplu nissalvagwardjaw il-ħarsien tal-annimali. L-annimali jagħmlu parti mill-familji tagħna u għalhekk rridu nieħdu ħsiebhom”.

Min-naħa tiegħu, is-Segretarju Parlamentari għall-Protezzjoni tal-Konsumatur u l-Indafa Pubblika Deo Debattista spjega li l-proposti tal-MCCAA sabu l-appoġġ sħiħ tal-imsieħba, l-awtoritajiet u l-għaqdiet mhux governattivi. “Dan huwa turija oħra ta’ kif l-aproċċ bilanċjat ta’ din l-Awtorità huwa effikaċi, u qed iwassal għal-sinerġija, fiduċja u sigurtà”, kompla s-segretarju parlamentari.

Iċ-Chairperson tal-MCCAA Helga Pizzuto spjegat kif l-Awtorità tibbaża d-deċiżjonijiet tagħha fuq l-evidenza xjentifika u l-edukazzjoni f’qafas regolatorju effettiv. Kompliet tgħid li, “L-għan tagħna huwa li jkollna użu sostenibbli tal-pestiċidi billi nnaqqsu r-riskji u l-effetti fuq is-saħħa tal-bniedem, fuq l-ambjent u l-annimali”.

Minn issa ‘l quddiem il-velenu tal-bebbux u l-bugħarwien jistgħu jinxtraw biss minn nies awtorizzati, bħal mhu l-bidwi, biex b’hekk jiġi żgurat li dawk li jixtru dawn il-prodotti jingħataw gwida xierqa dwar l-użu tagħhom u jiġi evitat avvelenament ta’ ċertu annimali.